अपि पावरद्वारा प्रवर्द्धित दार्चुला पावरले २८.३० मेगावाट मध्यचमेलिया जलविद्युत् आयोजनाको शिलान्यास

दार्चुलाको मार्मा गाउँपालिका–२ मा २८.३० मेगावाट क्षमताको मध्यचमेलिया जलविद्युत् आयोजना निर्माण हुन लागेको छ। दार्चुला पावर लिमिटेड प्रवद्र्धक रहेको यस आयोजनाको लागत पाँच अर्ब ६६ करोड रुपैयाँ रहनेछ। शनिबार कांग्रेस नेता दिलेन्द्रप्रसाद बडूले यसको शिलान्यास गरेका हुन् | मध्यचमेलिया जलविद्युत् आयोजनाको बाँधस्थल मार्मा गाउँपालिका–२, लाम्बगडमा रहँदा विद्युत्गृह मार्मा गाउँपालिका–३, नलबगडमा निर्माण गरिनेछ। बाँधस्थलबाट ३.३३ मिटर व्यासको एमएस पाइपलाइन मार्फत विद्युत्गृहसम्म पानी पुर्‍याइनेछ। गत वर्ष निर्माण सम्पन्न भएको अपर चमेलिया जलविद्युत् आयोजनाको विद्युत्गृहभन्दा आधा किलोमिटर तल मध्यचमेलियाको बाँध बन्नेछ। आयोजनालाई २४ महिनाभित्र सम्पन्न गर्ने लक्ष्य राखिएको छ भने ०८३ माघसम्म निर्माण सम्पन्न गरिने लक्ष्य लिइएको छ।

विद्युत् उत्पादन र प्रसारण योजना

यस आयोजनाबाट वार्षिक १८५.६२ गिगावाट-घण्टा विद्युत् उत्पादन हुने इन्जिनियर विष्णु शाहले जानकारी दिए। आयोजनाबाट प्रतिसेकेन्ड २५.१७ घनमिटर पानी प्रवाह हुनेछ भने नेट हेड (उचाइ) १२८.४६ मिटर रहनेछ। उत्पादन भएको विद्युत् नौ किलोमिटर तल बलाच सबस्टेसनमा जोडिनेछ।

लगानी संरचना र अपि पावर कम्पनीको संलग्नता

मध्यचमेलिया जलविद्युत् आयोजनामा नेपाल बैंक लिमिटेड र नबिल बैंकको ७५ प्रतिशत ऋण लगानी रहेको छ भने २५ प्रतिशत लगानी दार्चुला पावर लिमिटेडको स्वपुँजी रहनेछ। यस आयोजनामा अपि पावर कम्पनी प्रमुख सेयरधनी रहेको छ।

स्थानीय सहयोग र भविष्यका सम्भावित आयोजना

अपि पावर कम्पनीका सल्लाहकार गुरु न्यौपानेले आयोजनाको शिलान्यास कार्यक्रममा स्थानीय समुदायको साथ पाए थप जलविद्युत् आयोजनामा लगानी गर्ने बताएका छन्। उनका अनुसार दार्चुलामा यो चौथो जलविद्युत् आयोजना हो, र थप आयोजनाहरूको सम्भावना अध्ययन भइरहेको छ। न्यौपानेका अनुसार स्थानीय सहयोग प्राप्त भए भविष्यमा दार्चुलामा अझै धेरै जलविद्युत् आयोजना निर्माण गर्न सकिन्छ।

प्रसारण लाइन निर्माण र विद्युत् निर्यातको आवश्यकता

पूर्वमन्त्री तथा कांग्रेस नेता दिलेन्द्रप्रसाद बडूका अनुसार नेपाल–भारत जोड्ने पुल निर्माण भइसकेको छ, र अब विद्युत् प्रसारण लाइन निर्माणका लागि सरकार प्रयत्नशील रहेको छ। बडूले कानुन संशोधन गरी निजी क्षेत्रलाई प्रसारण लाइन निर्माण गर्न अनुमति दिनुपर्ने बताएका छन्।

उनका अनुसार दार्चुलाबाट उत्पादित बिजुलीलाई १३० किलोमिटर पर अत्तरियामा लैजानुभन्दा ३० किलोमिटर टाढा जोलजिबीबाटै भारतमा बिक्री गर्नु आर्थिक रूपमा लाभदायक हुनेछ।